Noyabrın 24-də Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyində xalqımızın ictimai-siyasi və mədəni yüksəlişində müstəsna xidmətlər göstərmiş dövlət xadimi, şair Şah İsmayıl Xətainin anadan olmasının 530 illiyinə həsr edilən “Xətainin qılıncı və qələmi” mövzusunda respublika konfransı keçirilib. Konfransda Gəncə Dövlət Universiteti Filologiya fakültəsinin Azərbaycan və dünya ədəbiyyatı kafedrasının baş müəllimi Səba Namazova və Fakültənin IV kurs tələbəsi İlkin Abbasov Şah İsmayıl Xətainin həyat və yaradıcılığı barədə məruzələrlə çıxış edib, onu görkəmli şəxsiyyət, dövlət xadimi, sərkərdə, şair kimi xarakterizə ediblər.
